Бэс ыйын 28 күнүттэн саҕалаан от ыйын 10 кунугэр дылы оскуола оҕолоругар „көрбөккө түргэнник бэчээттээһин“ ньыматыгар үөрэтии киин библиотека иһинэн ыытылынна. Бу ньыманы баһылааһын оҕо инники олоҕор дьылҕатыгар улахан суолталаах туһалаах буолар.

От ыйын 10 күнүгэр сайыҥҥы сайдыы лааҕырыгар оҕолорго аналлаах аныгы үйэ биир сайдыылаах технологиятыгар бастакы көрбөккө бэчээттээһин оройуоннааҕы куонкуруһу оройуоннааҕы бибилитиэкэ уонна оҕо бибилитиэкэтэ ыытта. Биир нэдиэлэ устата Х.М.Николаев аатынан Өлөөн орто оскуолатын информатика учуутала Катерина Леонидовна Алексеева оҕолору саҥа ньыманан бэчээттииргэ дьарыктаата. Манна кыттыыны ыллылар ыаллыы сытар Анаабыр оройуонуттан Туприна Женя, Сухомясова Камилла 6 кылаас үөрэнээччилэрэ, Дьокуускай куораттан сылдьар Шестопаловтар Илья уонна саамай кырачаан кыттааччы Дарина. Саамай дьулуурдаах, тулуурдаах оҕолорбут икки туурдаах мүнүүтэгэ бэчээттээн күрэхтэстилэр. Ол тыҥааһыннаах күрэх түмүгүнэн сыыһата суох, түргэнник бэчээттээн эрэллээхтик кыайыыны ситистэ Х.М.Николаев аатынан Өлөөн орто оскуолатын 8 кылааһын үөрэнээччитэ Скороходкина Сайаана. Кыайыылааха өйдөбүнньүк „ Кристальный Оленек“ кинигэ уонна грамотаны туттарда Өлөөннөөҕү кииннэммит библиотечнай ситим методиһа Екатерина Васильевна Николаева. Күрэх кыттааччыларыгар сертификат уонна минньигэс бириис туттарылынна.

Кылгас бириэмэҕэ дьарыктаммыт саҥа бэчээттээһин биир көрүҥүн баһылаабыт оҕолор өссө бэйэлэрэ эбии дьарыктанан билиилэрин сайыннаралларыгар баҕарабыт. Инники олохторугар туһалаах буолуо диэн эрэнэ хаалабыт.

Мария Карпова

Оҕо бибилитиэкэтин сэбиэдиссэйэ.